Muja në festival fëmijësh, shpenzoi 3 000 euro
Kryetari i Komunës së Prizrenit, Ramadan Muja, në shoqëri të bashkëpunëtorëve të ngushtë të qeverisë komunale, ka shpenzuar afër tre mijë euro për një vizitë në Turqi, ku kanë marrë pjesë në një festival vallesh për fëmijë. Edhe pse bëhet fjalë për manifestim kulturor, dedikuar fëmijëve, kryetari Muja nuk ka hezituar që me vete të marrë kryesuesin e Kuvendit Komunal, Nijazi Kryeziu, drejtorin e Administratës, Minir Krasniqi, drejtorin e Shërbimeve Publike, Hasan Hasani, nënkryetarin për komunitete, Orhan Lopar dhe nëpunësit, Afrim Gashi e Sadik Gashi, transmeton Koha.net.
Këta zyrtarë duke qenë në Festivalin e pestë ndërkombëtar të valleve për fëmijë, të mbajtur më 19-23 prill të këtij viti në Bejkoz të Republikës së Turqisë, në emër të mëditjeve kanë marrë mbi dy mijë euro, derisa biletat e udhëtimit kanë kushtuar 916 euro.
Në lidhje me këtë rast dhe shpenzimet e bëra për udhëtime zyrtare ka reaguar OJQ-ja "EC Ma Ndryshe", e cila ka bërë të ditur faktin se për udhëtime zyrtare gjatë 7 muajve të këtij viti ekzekutivi komunal ka shpenzuar 18 mijë euro, ndërkohë që objektivat e vizitave të tilla kanë qenë të zbehta dhe të paargumentuara mirë. /Telegrafi/
