Mustafa: Deklarata e 2 Korrikut i hapi rrugën pavarësisë
Me rastin e 2 Korrikut, Ditës së miratimit të Deklaratës Kushtetuese për pavarësinë e Kosovës, Lidhja Demokratike e Kosovës ka mbajtur një varg aktivitetesh, në të cilat, përveç drejtuesve të lartë të partisë dhe anëtarësisë së gjerë, kanë marrë pjesë edhe deputetët e Kosovës të legjislaturës së viteve ’90, të cilët e miratuan Deklaratën e 2 Korrikut, e cila u hapi udhë veprimeve të mëvonshme institucionale drejt pavarësisë së Kosovës.Në kuadër të këtyre aktiviteteve, në Shtëpinë e Kulturës në Viti, Dega e LDK-së e këtij qyteti organizoi një manifestim solemn, në të cilën ishte i pranishëm edhe kryetari i LDK-së, Isa Mustafa, i cili, ndër të tjera, pohoi se miratimi i Deklaratës Kushtetuese të 2 Korrikut paraqet një moment të veçantë të historisë më të re të popullit të Kosovës, sepse kjo deklaratë ishte hapi i parë institucional në procesin e gjatë për lirinë dhe pavarësinë e Kosovës.
“Deklarata e 2 Korrikut, si dhe aktet që e pasuan atë, Kushtetuta e Kaçanikut dhe Referendumi për pavarësi, u bënë pikënisje e Lëvizjes sonë nacionale për liri, pavarësi dhe demokraci, së cilës i priu Presidenti ynë historik, dr. Ibrahim Rugova”, tha Mustafa.
Më tej, ai veçoi se me idealet e këtyre akteve madhore, shqiptarët e Kosovës nisën rezistencën e armatosur për çlirimin e vendit, e cila u kurorëzua falë luftës së UÇK-së dhe ndihmës së Shteteve të Bashkuara të Amerikës dhe vendeve të tjera anëtare të NATO-s.
“Manifestimin e sotëm në Viti e bëri më të veçantë anëtarësimi i 500 të rinjve të kësaj ane në LDK. Me këtë rast, Mustafa në mënyrë simbolike ua dha librezat e LDK-së të rinjve të porsaanëtarësuar”, thuhet ndër të tjera në një njoftim të LDK-së. /Telegrafi/
