Ndalohen 6 sirianë në Gjirokastër
Policia e Gjirokastrës ka bllokuar 6 shtetas Sirianë, 3 në aksin rrugor Gjirokastër –Tepelenë, si dhe 3 në aksin rrugor Gjirokastër-Jergucat. Ndalimi i tyre është bërë dje rreth orës 17.30, në Aksin rrugor Gjirokastër-Tepelenë, në afërsi të Tepelenës, në një automjet tip “Ford” me targa të huaja që drejtohej nga Grigor Sulaj 45-vjeç. Ndërkohë tre shtetasit e tjerë sirianë janë kapur në afërsi të fshatit Grapsh, të cilët po udhëtonin në këmbë në drejtim të Gjirokastrës, pasi kishin kaluar me këmbë nga poshtë postbllokut të policisë në Jergucat .
Sipas policisë, sirianët kanë hyrë nëpërmjet kufirit jeshil nga Greqia dhe për t’ju shmangur postoblloqeve të Policisë në Jergucat dhe në Ujin e Ftohtë Tepelenë, në këto segmente rruge zbresin nga makina dhe kalojnë me këmbë nga poshtë pikës së kontrollit.
Nga hetimet rezulton se këta persona, janë ndihmuar që në Athinë nga një qytetar nga Tepelena, i cili i ka ndihmuar të hyjnë në Shqipëri dhe më pas i ka hipur në automjetin tip Furgon të shtetasit të sipërpërmendur për t’i transportuar në Tiranë, transmeton noa.al.
Policia ka shpallur në kërkim dy shtetas një nga Tepelena dhe një nga Tirana, pasi organizojnë dhe zhvillojnë trafikun e shtetasve të huaj marokenë, sirianë, algjerianë e Palestinezë nga Athina në Shqipëri e më pas në Malin e Zi , kundrejt vlerës 1500 euro për person. /Telegrafi/
