Ndreca, letër Sekretares Clinton
Gjergj Ndreca, ish-i burgosuri politik që i vuri zjarrin vetës, pasi është rikthyer nga Greqia ku mori mjekim të specializuar, i ka dërguar një letër Sekretares amerikane të Shtetit, Hillary Clinton.Në letër Ndreca denoncon mashtrimin e qeverisë, pasi ligji i miratuar në vitin 2007 për dëmshpërblimin e ish-të dënuarve politikë e detyron atë të mbyllte këtë proces deri në vitin 2015. Ndreca shprehet në letër se me këtë ritëm ata do të marrin paratë pas 40 vitesh.
"Thelbi i kërkesave tona, ka të bëjë me një defekt themelor të shoqërisë ku jetojmë, moszbatimin e ligjit. Kërkesat tona u injoruan dhe në vend të dialogut dhe zgjidhjes u përballëm me një fushatë përbaltjeje, si kriminelë ordinerë”, shkruan ai, transmeton “Shekulli”.
“Akti im dhe i mikut tim Lirak Bejko, që shkuam me qetësi drejt vetëflijimit, nuk është akt i njerëzve të dëshpëruar, por i qytetarëve të vendosur që duan të ndezin shpresën e një shoqërie, e cila është lodhur nga zhgënjimet, korrupsioni dhe regjimet autoritare", thuhet në letrën që ia i ka dërguar sekretares Clinton. Ndreca shprehet se faktori ndërkombëtar është shpresa e fundit e tyre. /Telegrafi/
