Ndryshimet kushtetuese, kërkohet pavarësi në institucione
Këshilli i Legjislacionit për diskutimin e ndryshimeve kushtetuese të propozuara nga Partia Socialiste ka nisur seancën dëgjimore me grupet e interesit.Përfaqësuesit e Euralius në këshill e kanë cilësuar si shumë të rëndësishëm heqjen e imunitetit, ndërsa u kërkua rikonfigurimi i sistemit gjyqësor dhe pavarësia e tij.
Sakaq përfaqësuesit e OSBE kërkuan që të hiqet imuniteti si dhe të arrihet pavarësia e institucioneve si një domosdoshmëri për ecurinë e vendit.
Në këtë kuadër u theksua se çështja e imuniteteve është një çështje që duhet të miratohet sa më shpejt që të jetë i mundur.
Siç informon noa.al gjatë mbledhjes së Këshillit të Lartë të Drejtësisë, nënkryetari i KLD, Elvis Cefa tha se ndryshimet për anëtarët e KLD janë të panevojshme, pasi mund të ekzistojë mundësia e një bllokimi të anëtarëve të këtij këshilli nga politika.
Këshilli i Legjislacionit e nisi mbledhjen me konfirmimin e pranisë së të ftuarve, por pa praninë e përfaqësuesve nga Prokuroria e Përgjithshme.
Kujtojmë këtu se paketa kushtetuese e propozuar nga Partia Socialiste lidhet me zgjedhjen e anëtarëve të Gjykatës së Lartë, Gjykatës Kushtetuese, anëtarëve të Këshillit të Lartë të Drejtësisë dhe Prokurorit të Përgjithshëm, me shumicë të cilësuar. /Telegrafi/
