Në hall me amendamentet jokushtetuese
Kuvendi i Kosovës nuk është duke ditur si të sillet me amendamentet kushtetuese që i referohen ndryshimit të kompetencave të presidentit dhe mënyrës së zgjedhjes së tij. Hamendjet më të mëdha i ka për amendamentet që kanë dalë të jenë jokushtetuese.Një burim i gazetës “Koha Ditore” ka thënë se, në disa takime joformale, deputetë të pozitës dhe të opozitës, të përfshirë në Komisionin për ndryshime kushtetuese, kanë shtruar tezën se mund të riformulohen dhe të qiten për votim edhe amendamente, të cilat me aktgjykimin e Gjykatës Kushtetuese ka dalë se pakësojnë të drejtat dhe liritë e njeriut të garantuara në Kapitullin II. Sipas tij, ato do të mund të riformuloheshin deri në seancën kur të votohen edhe amendamentet që kanë marrë dritën jeshile të Kushtetueses. Por, ka pasur edhe deputetë që nuk e kanë mbështetur këtë rrugë.
“Për shkak që procedura për veprimet e mëtejme nuk është e sqaruar si duhet, shumica janë dakorduar që disa amendamente të riformulohen në frymën e aktgjykimit të Gjykatës dhe të votohen pastaj”, ka thënë ky burim i gazetës, i cili ka shtuar se nenet antikushtetuese janë ndarë në dy grupe nga deputetët. /Telegrafi/
