Në Itali shkatërrohet karteli afrikan

18:11 / 15.01.2013

Policia italiane dhe Guardia di Finanza kanë ndërmarrë një operacion masiv kundër dy organizatave kriminale somaleze, të akuzuara për trafik të qenieve njerëzore.

Sipas mediave italiane, në pranga kanë përfunduar 55 persona, mes të cilëve një punonjës afrikan në ambasadën italiane të Nairobit dhe një tjetër i Programit Botëror të Ushqimit, transmeton TCH.

Të arrestuarit akuzohen për një seri veprash penale, mes të cilave favorizim të emigracionit klandestin, falsifikim dokumentash, pastrim parash, abuzime financiare, etj.

Sipas burimeve, ata trafikonin qytetarë që vinin nga Briri i Afrikës dhe që përmes territorit italian udhëtonin drejt vendeve të Evropës Veriore.

Hetimet e koordinuara nga Drejtoria Kombëtare e Antimafias treguan se karteli kriminal, i përbërë nga celula operative të rrënjosura në Itali, Kenia dhe Libi, i lëvizte emigrantët përmes Maltës, Greqisë dhe më pas në Itali.

Këtu ata vendoseshin në Romë, Milano, Torino, Firence, Napoli, etj, të konsideruara si qytete strategjike për shkak të aeroporteve që i lidhin me metropolet e tjera evropiane.

Emigrantët pajiseshin me dokumenta të falsifikuara dhe dërgoheshin në Holandë, Francë, Britani dhe sidomos në Danimarkë, Norvegji, Suedi dhe Finlandë.

Në disa nga këto vende janë lokalizuar celula të tjera operative të organizatës, shton më tej në njoftimin e saj agjencia e lajmeve ANSA. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.