Në zgjedhje edhe me ligjin e vjetër
Dështimi për ta bërë reformën zgjedhore që ka qenë e kërkesë e vazhdueshme e Bashkimit Evropian, ka bërë që partitë parlamentare të mos e përjashtojnë mundësinë e mbajtjes së zgjedhjeve të ardhshme pa reformë. Këtë mundësi përfaqësuesit e partive e shohin si të mundshme pasi që Komisioni Parlamentar për Reformë Zgjedhore e përfundoi mandatin pa rezultat, sepse për dy vjet me radhë liderët e partive politike nuk arritën konsensus rreth sistemit zgjedhor, i cili, sipas rekomandimeve të BE-së, është dashur të thjeshtësohet. Puna e këtij komisioni u pamundësua me vendimin e LDK-së për t’u tërhequr nga komisioni derisa PDK-ja nuk shprehet e gatshme për ta zbatuar marrëveshjen për presidenten. Dhe tashmë kur kalkulimet e partive për koalicionin e mundshëm PDK-AAK kanë nisur, organizimi i zgjedhjeve nacionale, por edhe presidenciale, nuk përjashtohet se do të ndodhë pa reformë edhe pse po të njëjtët zyrtarë të partive politike shprehen se mbajtja e zgjedhjeve me Ligjin e vjetër zgjedhor nuk do të garantonte votë të lirë.
Ndonëse ka thënë se nuk është kompetent për të folur në emër të partisë, anëtari i PDK-së në Komisionin Parlamentar për Reformën zgjedhore, Behar Selimi, ka theksuar se, me gjithë zhvillimet sa i përket reformës zgjedhore, “PDK-ja nuk i druan çfarëdo zgjedhjesh kurdo që do të mund të organizoheshin ato”.
Ai ka shtuar se “zgjedhjet në nivel nacional nuk do të duhej mbajtur pa përfunduar reforma zgjedhore e cila duhet të mos vonohet. E kemi rastin t’i bëjmë mirë së ardhmes demokratike të vendit, por edhe përmirësimit të raporteve ndërkombëtare me Kosovën”, shkruan "Koha Ditore".
Edhe LDK-ja e Isa Mustafës nuk i frikësohet hyrjes në zgjedhje pa përfundimin e reformës zgjedhore. Por edhe zyrtarë të kësaj partie e shohin të rrugës që zgjedhjet e ardhshme të organizoheshin me reformë për të cilën, siç thotë shefi i Grupit Parlamentar të LDK-së, Ismet Beqiri, është arritur konsensusi që në fillim, të cilin, sipas tij, PDK-ja nuk po e respekton.
Ndryshe nga PDK-ja e LDK-ja, AAK-ja e Ramush Haradinajt nuk shprehet e gatshme që të hyjë në zgjedhje pa përfunduar procesi i reformës zgjedhore. Nënkryetari i kësaj partie, Ahmet Isufi, ka vlerësuar se mbajtja e zgjedhjeve të mundshme pa përfundimin e reformës nuk do të sjellë ndonjë ndryshim dhe se keqpërdorimet e votës do të përsëriteshin.
Por zgjedhjeve të mundshme pa reformë, nuk u frikësohet Lëvizja Vetëvendosje e Albin Kurtit. Deputetja e kësaj lëvizjeje që ishte anëtare e Komisionit për Reformën Zgjedhore, Albulena Haxhiu, ka thënë se “ne, me ose pa këto ndryshime, në çdo kohë jemi të gatshëm që të hyjmë në zgjedhje dhe ta mbrojmë votën e qytetarit. E theksojmë se asnjë ligj nuk lejon vjedhjen e votës, as ky që kemi aktualisht”.
Gazeta ka provuar të marrë edhe qëndrimin e Koalicionit për Kosovë të Re, lidhur me këtë çështje por shefja e Grupit Parlamentar, Myzejene Selmani, nuk ka qenë e gatshme të fliste për këtë çështje. /Telegrafi/
