Nimetz në Athinë
I dërguari i posaçëm i sekretarit të përgjithshëm të OKB-së për çështjen e emrit, Matthew Nimetz, do të takohet sot, në Athinë, me kryeministrin grek Lukas Papadhimos dhe me shefin e diplomacisë, Stavros Dhimas. Mediat greke transmetojnë se para takimit me Nimetzin, të caktuar për ora 15 e 30 sipas kohës lokale, Papadhimos do të ketë konsultime me Dhimas, i cili duhet të takohet edhe me liderin e PASOK-ut, Jorgos Papandreun.
Ndërmjetësuesi i OKB-së udhëtoi nga Shkupi, ku të hënën bisedoi me presidentin dhe kryeministrin e Maqedonisë.
Pas takimeve ai deklaroi se nuk sjell propozime të reja, por ka për qëllim të gjejë një mënyrë që të përshpejtohen bisedimet për zgjidhje më të shpejtë të kontestit me emrin, i cili, siç theksoi, e prek rajonin dhe sigurinë botërore, transmeton “Zhurnal”.
Nga ana e Maqedonisë është përsëritur se zgjidhja për kontestin me Greqinë rreth emrit nuk është e mundshme përderisa kjo nuk e respekton “dinjitetin e qytetarëve të Republikës së Maqedonisë”. /Telegrafi/
