OKB: Dënohet filmi anti-islamik dhe reagimi i dhunshëm
Agjencia për të Drejtat e Njeriut e Kombeve të Bashkuara e ka dënuar filmin dhe karikaturat që konsiderohet se e fyejnë Profetin Muhamed, por e kanë dënuar edhe reagimin e dhunshëm ndaj tyre në gjithë botën arabe.Zëdhënësi i kësaj agjencie, Rupert Colville, u tha gazetarëve në Gjenevë se “si filmi ashtu edhe karikaturat janë provokim keqdashëse dhe të qëllimshme”.
Por, ai ka theksuar se “nuk ka arsyetim të mundshëm për reagimet e dhunshme dhe shkatërruese”, transmeton REL.
Mëtutje, Rupert Colville, që është zëdhënës i Komisioneres së Lartë për të Drejtat e Njeriut të OKB-së, Navanethem Pillay, theksoi se “sipas pikëpamjes sonë, mënyra më e mirë për tu marrë me këto provokime të qëllimshme dhe të krisura, është që ato të injorohen dhe të privohen nga publiciteti”.
Gjatë 10 ditëve të reagimeve të dhunshme ndaj filmit “Pafajësia e Myslimanëve” dhe karikaturave satirike të revistës franceze “Charlie Hebdo”, janë vrarë më se 30 vetë. /Telegrafi/
