Opozita nuk do të jetë pjesë e ekipit të unitetit për dialog
Partitë politike të opozitës ia kanë bërë të qartë Qeverisë së Kosovës se nuk do të jenë pjesë e ndonjë grupi të unitetit, të ngjashëm me atë të bisedimeve në Vjenë të vitit 2007, për vazhdimin e dialogut teknik me Beogradin, në të cilin mund të përfshihet edhe çështja e veriut. Përfaqësuesit e LDK-së, Vetëvendosjes dhe AAK-së kanë thënë se kontributin e tyre do ta japin vetëm në Kuvendin e Kosovës, shkruan “Epoka e Re”.
Sekretari i përgjithshëm i LDK-së, Ismet Beqiri, ka thënë se ky subjekt politik nuk do të angazhohet në trupa apo mekanizma të llojit të ekipeve në dialog me Beogradin, në të cilin mund të përfshihet edhe çështja e veriut.
Beqiri ka mohuar se LDK-ja ka pasur ofertë nga qeveria që të jetë pjesë e dialogut.
Fuqishëm pjesëmarrjen në këtë dialog nëpërmjet ndonjë ekipi të unitetit e ka kundërshtuar edhe Vetëvendosje.
Zëdhënësi i Vetëvendosjes, Erzen Vraniqi ka thënë se kjo qeveri, duke qenë e korruptuar dhe e shantazhuar, është e detyruar të futet në dialog politik për veriun.
Ai ka thënë se tendenca për të krijuar një ekip negociator të ngjashëm me grupin e unitetit të vitit 2007 është vetëm një tendencë e qeverisë për ta shpërndarë përgjegjësinë.
Edhe nënkryetari i AAK-së, Ahmet Isufi ka thënë se ky subjekt politik nuk do t’i bashkohet Qeverisë së Kosovës në asnjë dialog në të cilin mund të diskutohen çështjet e brendshme të Kosovës, konkretisht çështja e veriut.
Por, Isufi ka thënë se AAK-ja është e gatshme të bashkëpunojë me qeverinë vetëm kur janë në pyetje bashkëpunimet rajonale. /Telegrafi/
