OSBE dhe “Gazetarët pa Kufij” dënojnë sulmin ndaj Matoshit

Përfaqësuesja e OSBE-së për Lirinë e Shtypit, Dunja Mijatovic tha se dhuna kundër gazetarëve është sulm kundër lirisë së shprehjes dhe shoqërisë në përgjithësi dhe unë i dënoj me forcë akte të tilla.

Organizata Gazetarët pa Kufi shprehu gjithashtu tronditjen për dhunën e skajshme të sulmit, me anë të një deklarate. “Vënia në shënjestër e një anëtari të tillë me peshë në median kombëtare, i njohur për kritikat ndaj qeverisë, dërgon një mesazh shumë shqetësues për gjithë gazetarët e Kosovës, i frikëson dhe mund t’i detyrojë të ushtrojnë autocensurë”, thuhet në deklaratë, raporton VOA.

Gazetarët pa Kufi i bën thirrje autoriteteve që të bëjnë të gjitha përpjekjet për të vendosur personat përgjegjës para drejtësisë. Organizata shton se nuk duhet përjashtuar mundësia që ky sulm të ketë qenë i lidhur me punën e gazetarit Matoshi. “Do të ishte e paimagjinueshme që një vend që do të futet në Bashkimin Evropian të lejonte pandëshkueshmërinë”.

Publicisti Matoshi u sulmua para dy ditësh ndërsa kthehej nga një aktivitet kulturor në qarkun e Dardanisë. Dy nga sulmuesit e goditën atë me grushta dhe shkelma, nëdrsa i treti u përpoq disa herë ta godiste me thikë. Ai arriti t’i shmangte goditjet me thikë derisa autorët e sulmit u larguan kur panë se po vinin kalimtarë. Ai njihet për artikujt e tij hulumtues dhe kritikat kundër politikanëve dhe zyrtarëve publikë. /Telegrafi/