Pack: Hiqni imunitetin e gjyqtarëve, jo deputetëve

Eurodeputetja e grupit të Partive Popullore Evropiane, në një intervistë për “Albanian Screen”, - shprehet për procedura lehtësuese për heqjen e imunitetit të politikanëve me kërkesë të prokurorisë, por jo lënie e tyre pa këtë mburojë.

“Tek ne vetëm parlamentarët kanë imunitet. Por ky mund të hiqet nga parlamenti kombëtar, ose nga Parlamenti Evropian. Këtë unë e quaj një veprim normal sepse të gjithë parlamentarët janë të barabartë me qytetarët e tjerë. Por, në ndryshim nga këta, deputetët kanë njëfarë garancie, meqë herë pas here ata flasin në emër të popullit”, sqaron Pack.

Kurse gjykatësit, sipas saj, nuk kanë imunitet, sepse ata nuk janë të zgjedhur nga populli. Ata janë funksionarë të emëruar dhe këta nuk kanë imunitet.

“Edhe këtu në Parlamentin Evropian funksionarët nuk kanë imunitet”, tha Doris Pack.

Sipas Pack, nuk janë të rralla rastet kur prokuroritë e vendeve anëtare kërkojnë hetimin e eurodeputetëve, madje kjo është bërë një praktikë e përmuajshme sipas saj, transmeton BalkanWeb.

“Nëse shikoni procedurën e Parlamentit Evropian, do të shihni se pothuajse çdo muaj ne votojmë për heqjen e imunitetit të njërit apo tjetrit deputet, me kërkesën e gjykatave të vendeve të tyre. Kështu veprohet këtu, kështu duhet të veprohet edhe tek ju”, nënvizoi Pack, duke komentuar debatin më të fundit në politikën shqiptare. /Telegrafi/