Pakistan, 47 të vrarë nga sulmi me bombë

17:56 / 16.02.2013

Të paktën 47 persona janë vrarë dhe shumë të tjerë janë plagosur në një sulm me bombë të kryer në një treg të populluar në qytetin Kueta të Pakistanit.

Oficeri i policisë lokale, Wazir Khan Nasir tha për agjencinë e lajmeve “AFP” se të paktën 200 persona janë plagosur dhe bilanci i viktimave mund të rëndohet.

Bomba është shpërthyer në distancë përmes një telekomande, në një zonë të dominuar nga banorë shiitë, tha oficeri, i cili e ka cilësuar ngjarjen si një sulm sektar me objektiv komunitetin në fjalë.

Kueta është kryeqyteti i provincës së Baloçistanit, që ndodhet në kufi me Iranin dhe Afganistanin dhe është përgjakur nga rebelimi separatist dhe dhuna sektare.

Muajin e kaluar të paktën 92 persona u vranë në një sulm me bombë dhe 121 të tjerë u plagosën kur atentatori vetëvrasës e hodhi veten në erë në një klub të populluar bilardoje, po në zonën me komunitet shiit.

Grupi militant sunit Lashkar e Jhangvi mori përsipër përgjegjësinë për sulmin e 10 janarit, që ishte dhe më i rëndi i kryer vitet e fundit në Pakistan.

Komuniteti shiit u irritua deri në atë pikë saqë refuzoi të varroste viktimat derisa të merrte mbrojtje dhe siguri nga shteti, të cilat mesa duket nuk i ka marrë as deri tani.

Pas bisedimeve të zhvilluara me përfaqësuesit e komunitetit shiit në Kueta, kryeministri pakistanez Raja Pervez Ashraf shkarkoi guvernatorin e Baloçistanit. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.