Partitë shqiptare, pa strategji për zgjedhjet
Derisa partitë maqedonase kanë shpalosur strategjitë se si do të veprojnë për tërheqjen e elektoratit të tyre, partitë shqiptare akoma nuk kanë shpalosur strategjitë e tyre.Partitë politike në Maqedoni në mënyrë aktive po përgatiten për zgjedhjet e ardhshme lokale dhe mundësinë e zgjedhjeve të parakohshme parlamentare.
VMRO-DPMNE po aplikon projektin e saj për zgjedhjet lokale me moton "Idetë e reja", ku qytetarët kanë mundësitë për të ofruar idetë e tyre pranë komunave si dhe projekte të ndryshme. Edhe Lidhja Social Demokrate Maqedonase (LSDM) ka theksuar se do të zbatojë projektin e saj "Hape derën për të ardhmen", ku është planifikuar tërheqja e votuesve derë më derë dhe vizitat e ndryshme tek qytetarët, shkruan INA.
Ndërkohë, partitë shqiptare akoma janë të heshtura lidhur me përgatitjet e tyre për zgjedhjet lokale. BDI nuk ka zhvilluar ndonjë aktivitet apo shpalosjen e ndonjë strategjie për zgjedhjet e ardhshme. PDSH po vazhdon me fushatën e promovimit të kandidatëve të saj në garën për komunat, ku kandidatët e prezantuar po shpalosin projektet dhe prioritetet e tyre fillestare. RDK gjithashtu nuk ka ndonjë aktivitet të veçantë, mirëpo nga kjo parti theksojnë se grupe të punës po hartojnë një strategji e cila do të jetë e para sa i përket një partie shqiptare në Maqedoni, e cila siç thuhet do të jetë “model i ri dhe ofertë e re për votuesin shqiptarë përmes projekteve konkrete”.
Demokracia e Re (DR) bën të ditur se po punon në terren për forcimin e strukturave partiake dhe se kjo parti gjithashtu bën të ditur se ka nisur parapërgaditjet për zgjedhjet e ardhshme lokale. /Telegrafi/
