Pejë, kremte madhështore në 5 vjetorin e pavarësisë
Që në mëngjesin e sotëm kanë nisur aktivitete të shumta për të shënuar në mënyrë sa më dinjitoze 5 vjetorin e shtetësisë së Kosovës nga qytetarët pejanë.Fillimisht janë bërë homazhe dhe janë vënë kurora lulesh tek përmendoret e dëshmorëve.
Ceremonia kryesore u bë me një akademi solemne ku morën pjesë përfaqësues të Komunës së Pejës, përfaqësues të komuniteteve fetare, deputetë të legjislativit kosovar, përfaqësues të organizatave të ndryshme, si dhe qytetarë të shumtë.
Me këtë rast kryetari i Komunë së Pejës, Ali Berisha, ka thënë se rrugëtimi i gjatë dhe i mundimshëm i popullit shqiptar ka sjellë deri tek arritja e pavarësisë.
”Shteti i Kosovës erdhi si kundërshtim i errësirës, si kundërshtim i robërisë dhe kjo falë atyre që ranë për këtë liri, falë dëshmorëve tonë”, është shprehur kryetari Berisha.
Seanca solemne u përmbyll me një program artistik në të cilin performuan këngëtarët Besjana Mehmeti, Gemza Aligjiku, Luan Vokshi, Shkodran Tolaj.
Gjatë ditës përvjetori i pavarësisë u shënua me aktivitete të shumta kulturore dhe sportive dhe në fund u përmbyll me një gala koncert në të cilin performuan emra të njohur të muzikës sonë. /Telegrafi/
