Pejsmejkerët, cak i ardhshëm i hakerëve!

22:47 / 22.06.2013

Ekspertët amerikanë paralajmërojnë për sulme të reja të mundshme kibernetike, që mund të ketë pasoja fatale në pajsijet mjekësore, si pejsmejkerët apo pompat e insulinës, si dhe pajisjet tjera spitalore.

Departamenti amerikan për Ushqim dhe Ilaçe (FDA), organi që ofron garanci për sigurinë shëndetësore në SHBA, ka kërkuar nga prodhuesit e këtyre pajisjeve që të shtojnë kujdesin.

FDA është e shqetësuar në lidhje me ndjeshmërinë e këtyre pajisjeve, në aspektin kibernetik, sepse mund të ketë sulme të hakerëve që mund të ndikojnë në pajisjet mjekësore dhe rrjetat e spitaleve.

Një skenar i tillë është menduar më herët në serinë Homeland, ku hakerët e vrasin presidentin amerikan kur futen në pejsmejker dhe shkaktojnë një elektroshok fatal.

"Lajm i mirë është se ne nuk kemi hasur në asnjë ngjarje të tillë në botën reale. Por, lajmi i keq është se askush nuk interesohet për këtë temë në aspektin shkencor”, thotë profesori Kevin Fu nga Universiteti i Michiganit. “Virusi informatik mund të fitohet për një çast”.

Kevin Fu është bashkautor i studimit, i cili është 2008 vuri në dukje rreziqet e instalimit të aparateve në trupat njerëzor, siç janë pejsmejkerët të cilët hakerët mund ti riprogramojnë dhe të futen në rrjetin e tyre. Sipas tij, rreziku më i madh është virusi që mund të futet në ndonjë pajisje mjekësore.

"Viruset shpesh ngadalësojnë kompjuterët dhe kur ngadalësohet aparati mjekësor, ai nuk ka kapacitet të punojë si duhet”, tha Fu.

Ekspertët e sigurisë në kompaninë IOActive, thonë se skenarët e shfaqur në Homeland janë realë.

Pos pajisjeve, shumë aparate, si monitorët, shfaqin punën e zemrës. Pastaj janë skanerët, respiratorët artificialë, aparatet për terapi radiologjike... të cilat janë në rrjetin e internetit dhe siguria e tyre mund të rrezikohet. Po ashtu, mund të hakohen fjalëkalimet në ato aparatura.

Sipas ekspertëve në IOActive, gjasat janë të vogla, por çdo rrezik duhet të shmanget. Prandaj, prodhuesit duhet të shtojnë aspektet e sigurisë të këtyre pajisjeve. /Telegrafi/

 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.