Për Serbinë Rezoluta e Kosovës është provokim
Iniciativa e Partisë Demokratike të kryeministrit Hashim Thaçi, që Kuvendi i Kosovës të nxjerrë rezolutë për normalizimin e raporteve fqinjësore ndërmjet Kosovës e Serbisë, është vlerësuar si provokim nga ana e kësaj të fundit.Deputeti i Kuvendit të Serbisë nga partia e presidentit Tomislav Nikolic, Milovan Drecun, i cili edhe udhëheq Drejtorinë për Kosovën në këtë Parlament, në një intervistë për mediat kosovare, të dhënë në Beograd, ka deklaruar se miratimi i Rezolutës së Kuvendit të Kosovës për normalizimin e marrëdhënieve me Serbinë si dy shtete përbën provokim për Serbinë, duke qenë se Serbia në asnjë variant nuk e sheh Kosovën si palë në nivel të shtetit.
Në intervistë Drecun ka folur edhe për strategjinë e shtetit serb për dialogun ndërmjet Prishtinës e Beogradit, transmeton “Koha”.
Ai thotë se bisedimet ndërmjet dy vendeve duhet të fillojnë me një takim të përfaqësuesve të nivelit të lartë, duke mos e përjashtuar këtu takimin në mes të kryeministrit të Serbisë, Ivica Dacic dhe kryeministrit Hashim Thaçi.
Drecun thotë se strategjia e Serbisë nuk e parasheh ndarjen e Kosovës, porse përsërit qëndrimin e presidentit Nikolic se në rast se Serbisë i kërkohet që përfundimisht të heqë dorë nga Kosova për t’u anëtarësuar në BE, Drecun thekson se Serbia do ta lërë BE-në dhe do ta mbrojë Kosovë. /Telegrafi/
