Pesë vjet burg kosovarëve për 15 gr. marihuanë

Gjykata e shkallës së parë në Shkodër ka vendosur që tre të rinjtë nga Gjilani i Kosovës të dënohen me kusht 5 vjet, ndërsa do jenë në gjendje të lirë.

Bylbyl Bunjaku, 26 vjeç, Hekuran Sahiti, 23 vjeç, Pëllumb Morina, 21 vjeç qenë kapur në dalje për në drejtim të Malit të Zi, pasi gjatë kontrollit të ushtruar nga shërbimet e policisë kufitare, në automjetin Volksëagen Polo, u gjetën dhe u sekuestruan në cilësinë e provës materiale 8 qese farmacie plastike transparente, të mbushura me marihuanë, me peshë gjithsej 15.4 gram.

Shtetasit kosovarë i kishin fshehur qeset me lëndë narkotike, ne trupat e tyre, pikërisht tek pjesa e belit, në brendësi të pjesës se rripit. Gjatë shqyrtimit gjyqësor, të akuzuarit,të tre studentë dhe muzikantë, pjesëtarë të një grupi muzikor kanë pohuar se po shkonin në Ulqin për një koncert së bashku me një këngëtar shqiptar dhe se lëndën narkotike e kishin për përdorim vetjak. Prokuroria e përfaqësuar nga prokurori Vatë Stakaj e ka hedhur poshtë këtë pretendim, duke theksuar se doza e marihuanës për përdorim personal është 1.8 gram, ndërsa tre të akuzuarit kanë pasur në total 15 gramë.

Siç raporton Shekulli online, procesi gjyqësor ndaj Labeat Kryeziut nga Suhareka, i ndaluar po më 6 gusht, në Muriqan, me të njëjtën akuzë, akoma nuk ka përfunduar. Ai u ndalua pasi duke udhëtuar në drejtim të Malit të Zi, pikërisht tek tavlla e duhanit të automjetit të tij është gjetur dhe sekuestruar në cilësinë e provës materiale një kuti metalike, në brendësi të së cilës kishte dy qese plastike transparente me material bimor në gjendje të tharë, lëndë narkotike marihuanë, me peshë gjithsej 7.2 gramë. /Telegrafi/