Petrov: Qeveria t’i dënojë ministrat e BDI-së
Kongresi Botëror Maqedonas (KBM), ka dalë me kumtesë në lidhje me pjesëmarrjen e ministrave shqiptarë në homazhet e bëra te varrezat e dëshmorëve si dhe pjesëmarrjen e përfaqësuesve të ARM-së në këto homazhe. “E drejta për të qenë në pushtet nuk do të thotë edhe keqpërdorim i rastit, por përgjegjësi. Për KBM është e papranueshme prezenca e ministrave qeveritarë nga BDI që të vendosin kurora me lule në varrezat e dëshmorëve të UÇK-së në Slupçan, si delegacion qeveritar dhe përfaqësues të ARM-së dhe e mbështet njoftimin e qeverisë dhe të Shtatmadhorisë së ARM-së se prezenca e tre ministrave të BDI-së nuk paraqet delegacion zyrtar”, thuhet në kumtesën e KBM-së.
Ndër të tjera në kumtesën e KBM-së, kryetar i së cilës është Todor Petrov, njeri i afërt i kryeministrit Nikola Gruevski thuhet se ndaj këtyre veprimeve duhet vendosen sanksione.
“KBM pret që partia më e madhe në qeveri t’i determinojë këto sjellje të cilës do qoftë parti shqiptare në pushtet në Maqedoni dhe t’i sanksionojë ata për shkak të rrezikut për përsëritjen e tyre!. Në shënimin e ngjarjeve të ndryshme që lidhen me UÇK-në në Maqedoni, nuk guxojnë që përshëndetje të japin persona zyrtar të Ministrisë së punëve të brendshme dhe të ARM-së”, thuhet në kumtesë.
Në fund të kumtesës thuhet se KBM apelon që të rishikohet rikomponimi i administratës shtetërore në dëm të maqedonasve, duke pasur parasysh se numri i përfaqësuesve të bashkësisë etnike shqiptare është shumë më i madh se sa numri real i pjesëmarrjes së tyre në popullatën e Maqedonisë. /Telegrafi/
