Policia arreston Bujar Bashën
Policia e Kosovës pas hetimeve dhe veprimeve operative të zhvilluara me parë ka realizuar një operacion policor, me ç’rast ka arrestuar personin e kërkuar Bujar (Rr) Basha, shtetas i Kosovës. Bujar Basha pasi ishte lëshuar për një pushim në shtëpi nuk është kthyer në burg në kohën e caktuar, duke qëndruar në arrati.
Operacioni është realizuar në rajonin e Pejës në një shtëpi private ku ai banonte, ndërsa gjatë bastisjes janë gjetur dhe konfiskuar tre pistoleta, një maskë e zezë, një thikë, dy kapela, dy kaçavida, një telefon celular.
Personi i arrestuar me autorizim të prokurorit përkatës është shoqëruar në lokalet e ndalimit policorë për 48 orë në pritje të procedurave të tjera ligjore.
Po ashtu në vazhdim të hetimeve të këtij rasti janë identifikuar dhe arrestuar edhe dy persona të dyshuar nga rajoni i Prizrenit, me dyshimin e bazuar se të njëjtit kanë kryer veprën penale “Arratisje dhe Mundësim i Arratisjes se Personit të Privuar nga Liria”.
Personat e arrestuar janë: N.T (1973) dhe K.T (1985), shtetas të Kosovës.
Me autorizim të prokurorit përkatës është bastisur shtëpia e personave të dyshuar dhe gjatë bastisjes policia ka konfiskuar në cilësi të provave materiale gjashtë fishek të kalibrave te ndryshëm , tre telefona mobile dhe një maskë me ngjyre të zezë. /Telegrafi/
