Policia e Gjirokastrës sekuestron 20 kg drogë
Policia e Gjirokastrës ka sekuestruar 20 kilogramë marihuanë në orët e hershme të mëngjesit. Pas marrjes së informacionit në rrugë operative se një automjet tip “BMV”, pa targa po transporton një sasi lënde narkotike nga fshati Lazarat në drejtim të Gjirokastrës, Policia ka pikasur automjetin e dyshuar, i cili po i afrohej Gjirokastrës.
Drejtuesi i automjetit sapo pa postbllokun e policisë ka shtuar shpejtësinë dhe devijuar drejtimin e lëvizjes.
Nga ndjekja e Policisë, siç njofton Noa, i dyshuari në aksin rrugor Lagja Punëtore- Sheshi i Çerçizit ka hedhur çantën nga makina poshtë rrugës dhe ka vijuar me shpejtësi të madhe lëvizjen.
Policia ka sekuestruar lëndën narkotike, 20 pako me në total 20 kilogramë marihuanë si dhe automjeti me të cilin transportohej lënda narkotike.
Mësohet se është bërë e mundur identifikimi i transportuesit të saj, por për arsye hetimi nuk bëhen të ditura. /Telegrafi/
