Pranga shqiptarit dhe policit italian, kapen me 3.5 kg heroinë
Një shtetas shqiptar dhe një polic italian janë arrestuar nën akuzën e trafikimit të lëndëve narkotike, të cilëve u janë gjetur në momentin e arrestimit rreth 3.5 kg lëndë narkotike të llojit heroinë. Në pranga është vënë shqiptari Edmond Beshaj, 28 vjeçar si dhe komandanti i policisë, Damiano Montinaro, 51 vjeçar.
Sipas policisë, fillimisht 1 kg lëndë narkotike është gjetur në makinën ku udhëtonin dy personat, ndërsa 2.5 kg janë gjetur gjatë kontrollit në banesën e italianit. Heroina kapte vlerën e rreth 80.000 euro dhe ishte gati për t’u nxjerrë në treg.
Ndërkaq, gjatë kontrollit të ushtruar në banesën e shqiptarit, Edmond Beshaj, i cili punonte në një kompani riparimi televizorësh në Leçe, policia nuk ka gjetur asgjë, por vetëm 735 euro të cilat janë sekuestruar.
Hetimet nga ana e policisë italiane vazhdojnë për të saktësuar se kujt i përkiste lënda narkotike dhe nëse Montinaro dhe Beshaj kanë vepruar vetëm apo janë pjesë e ndonjë organizate kriminale italo-shqiptare. /Telegrafi/
