Prangosen dy shqiptarët e dyshuar për vrasje në Itali
Policia e Lezhës dje vuri në pranga dy persona, të cilët ishin shpallur në kërkim nga Drejtësia Italiane për akuzën "vrasje e dyfishtë, kryer në bashkëpunim". Pas mbërritjes së letër porosisë nga autoritetet e vendit fqinj, blutë organizuan operacionin e koduar "Bashkëpunimi", i cili u finalizua me arrestimin e 29-vjeçarit, Ndrec Laska, banues në lagjen "Nënë Tereza" të Lezhës, si dhe të 24-vjeçarit Artan Gjoka nga lagjja "Varosh" e këtij qyteti. Burime nga policia lokale dhe homologëve italianë, bëjnë me dije se ngjarja për të cilën akuzohen dy personat në fjalë ka ndodhur më 6 prill të këtij viti. Mësohet se dy emigrantët shqiptarë gjatë një tentative grabitjeje në Perugia kanë vrarë nënë e bir.
Sipas policisë së vendit fqinj, 74-vjeçarja, Maria Raffaelli dhe 52-vjeçari, Sergio Scoscia u gjetën të masakruar në banesën e tyre, transmeton BalkanWeb.
Nga hetimet e kryera në vendngjarje, rezultoi se e moshuara ishte mbytur duke ia shtrënguar qafën me një shall. Ndërsa, djali i saj 52-vjeçar ishte lidhur me rrip dhe goditur me çekiç në kokë. Policia italiane nuk ka gjetur shenja të armëve të zjarrit në trupat e viktimave.
Në zonën ku banonin dy emigrantët shqiptarë kishin ndodhur edhe të tjera tentativa grabitjeje, por ajo e 6 prillit u shndërrua në tragjedi. Ndërkaq, policia e Lezhës sqaron se kanë nisur procedurat për ekstradimin e Ndrec Laskës dhe të Artan Gjokës në Itali. /Telegrafi/
