Prapa grilave hajni i stolive të arit
Njësiti i Hetimeve të Stacionit Policor të Ferizajt ka arrestuar të hënën F. B., 27 vjeç, nën dyshimin se ka qenë i përfshirë në disa raste të vjedhjes së stolive të arit në disa fshatra të Ferizajt. Zëdhënësi rajonal i policisë, togeri Agim Gashi, ka thënë se i dyshuari kishte operuar në fshatrat Mirosalë, Dardani dhe Prelez, ku nga shtëpitë e viktimave ia kishte dalë të grabis stoli ari.
"Gjatë intervistimit, i dyshuari ka pranuar se i ka kryer këto vjedhje të rënda dhe gjatë bastisjes është gjetur edhe një sasi e konsiderueshme e stolive të arit dhe të njëjtat janë konfiskuar nga policia", ka thënë Gashi
Me urdhër të Prokurorisë Komunale të Ferizajt, i dyshuari është dërguar në mbajtje për 48 orë deri në kompletimin e lëndës për gjykatë. /Telegrafi/
