Presidentja lavdëroi diplomacinë kosovare

17:44 / 31.12.2012

Presidentja e Kosovës, Atifete Jahjaga, priti sot në takim të fundvitit ministrin e punëve të jashtme të Kosovës, Enver Hoxhajn, me të cilin bisedoi për të arriturat e diplomacisë kosovare dhe për zhvillimet që e presin vendin gjatë vitit të ardhshëm.

Presidentja Jahjaga theksoi se politika e jashtme e Kosovës gjatë këtij viti ishte një politikë dinamike dhe proaktive që solli forcimin e subjektivitetit ndërkombëtar dhe faktorizimin e shtetit të Kosovës në arenën ndërkombëtare, duke pasur një varg njohjesh të rëndësishme si dhe pjesëmarrjen e Kosovës në takimet e ndryshme multilaterale dhe bilaterale. Gjithashtu duke pasur konferenca dhe takime të rëndësishme në Prishtinë, duke dhënë kështu një kontribut të rëndësishëm në proceset aktuale.

Ministri Hoxhaj e falënderoi Presidenten për mbështetjen dhënë MPJ-së dhe diplomacisë kosovare, duke thënë se Republika e Kosovës po prezantohet dinjitetshëm dhe në mënyrë bashkëkohore me një politikë që respekton parimet dhe konventat ndërkombëtare, një politikë që gëzon respektin e shteteve dhe të forumeve ndërkombëtare.

Politika e vendit gjatë vitit të ardhshëm përveç në vazhdimin e procesit të njohjeve do të përqendrohet në synimin e anëtarësimit të shtetit të Kosovës në organizatat dhe në mekanizmat ndërkombëtar, thuhet në njoftimin e lëshuar nga Zyra e Presidentes.

Presidentja Jahjaga ka pritur sot në një takim edhe komandantin e Forcës së Sigurisë së Kosovës, gjeneral Kadri Kastratin, i cili e njoftoi Presidenten e vendit për të arriturat në përmbushjen e planeve operacionale, për transformimin e FSK-së sipas standardeve të NATO-s dhe për synimet e FSK-së që të kryej detyra të specializuara dhe të marrë pjesë në misionet humanitare dhe paqeruajtëse në botë.

Presidentja, sot ka pritur edhe drejtorin e Agjencisë së Inteligjencës së Kosovës, Bashkim Smakajn, nga i cili u informua për punën e kësaj agjencie, për ndërtimin e të gjitha kapaciteteve të nevojshme për kryerjen e punëve dhe të detyrave dhe për bashkëpunimin ndërkombëtar. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.