Pritet shkarkimi i Malokut, për shkak deklaratës politike
Naim Maloku rrezikon të mbetet pa punë nëse vazhdon të sillet si politikan, duke mbajtur pozitë të drejtorit të burgut.“Shefat” e tij pritet që javën e ardhshme të marrin masa për shkak të deklaratave politike për zhvillimet në Kosovë.
Qëndrimi i tij i fundit ka qenë shumë kritik për ish-kolegun Jakup Krasniqi, të cilin e ka kritikuar se pse kaq vonë po flet për vjedhje të votave. Ai ka thënë se Krasniqi nuk do të duhej të pranonte të ishte kryetar i “hajnave”.
Burime nga Ministria e Drejtësisë kanë thënë se deklarata të tilla nuk do të tolerohen më. Pritet që javën tjetër të merren masa dhe nuk përjashtohet as shkarkimi nga detyra, shkruan “Koha Ditore”.
Por ish-anëtari i AAK-së zotohet se nuk do ta mbyllë gojën, sa herë që dikush e pyet për zhvillimet politike.
Me gjithë vërejtjet e “shefave” të Ministrisë së Drejtësisë që të mos prononcohet për media, për shkak se është drejtor burgu dhe ka status të shërbyesit civil, ai ka thënë se ka vuajtur burg e ka derdhur gjak për të pasur mendim dhe shprehje të lirë.
Maloku ka marrë vërejtje gojore në korrik të këtij viti që “ta mbyllë” gojën kur është fjala për politikë, por kjo nuk ka bërë punë. Ai ka mohuar se ka marrë ndonjë vërejtje. /Telegrafi
