Prokuroria Speciale nis hetimet ndaj Kelmendit

8:20 / 12.05.2013

Një Prokuror i EULEX-it në kuadër të Prokurorisë Speciale të Kosovës, ka nisur hetimet ndaj Naser Kelmendit.

Misioni evropian ka bërë të ditur për “Express” se hetimet po zhvillohen për të njëjtat vepra që Kelmendi dyshohet se i ka kryer në Bosnjë. Por EULEX nuk ka sqaruar nëse procesi gjyqësor eventual ndaj tij mund të zhvillohet në Kosovë.

“Express” ka pyetur EULEX-in nëse misioni evropian mund të procedojë edhe me procesin gjyqësor ndaj Kelmendit, brenda territorit të Kosovës nëse do të ketë aktakuzë ndaj tij.

Por për këtë nuk ka pasur përgjigje.

“Një prokuror i EULEX-it në Prokurorinë Speciale të Kosovës ka nisur një hetim lidhur me rastin e Kelmendit në bazë të njëjtave vepra për të cilat ai qe akuzuar në Bosnjë dhe Hercegovinë. Për këtë rast do të caktohet një prokuror vendas i PSRK’ së që t\'i kryej hetimet në një ekip të përbashkët me një prokuror të EULEX-it”, ishte përgjigja e Krasniqit.

Ai tha se Sarajeva nuk ka dorëzuar ende dosjen me provat materiale kundër Kelmendit.

Ndërsa bëri të ditur se rasti “Kelmendi” është në juridiksion ekskluziv të Prokurorisë Speciale të Kosovës.

“Meqë i dyshuari është duke u hetuar, mes tjerash, edhe për krim të organizuar”, thuhet në përgjigjen zëdhënësit të EULEX-it.
EULEX ka përsëritur se nuk mund të kryejë ekstradimin e Kelmendit në Bosnjë, meqë misioni punon në bazë të ligjeve të Kosovës, por mund ta lehtësojë komunikimin mes dy shteteve.

“Stafi i EULEX-it në Ministrinë e Drejtësisë mund t\'i lehtësojnë kontaktet ndërmjet aktorëve përkatës”, ka thënë Krasniqi.
Ekstradimi i Kelmendit për në Bosnjë dhe Hercegovinë është paraqitur si problem meqë ky shtet nuk e njeh Kosovën dhe si pasojë nuk ka as marrëveshje ndërkombëtare për ekstradim me të.

Ekspertë të drejtësisë, ekstradimin eventual të Kelmendit për në shtetin që nuk e njeh Kosovën, e kanë cilësuar si shkelje të rëndë kushtetuese dhe ligjore.

Naser Kelmendi është arrestuare javën e kaluar nga Policia e Kosovës pas një fletarrestimi të lëshuar nga Interpol. /Telegrafi/

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.