Protesta kundër rritjes së çmimit të energjisë
Nga java tjetër janë paralajmëruar protesta në Shkup kundër vendimit për rritjen e çmimit të energjisë elektrike. Protestat janë paralajmëruar përmes rrjeteve sociale të internetit, ndërsa janë ftuar qytetarët që masivisht të dalin në protestat në mbrëmjen e së hënës përballë kompleksit tregtar Ramstor.
Organizator të protestës është paraqitur lëvizja “Zeitgeist” Maqedoni, e cila theksoi se paraprakisht mbi 12 mijë qytetarë kanë paralajmëruar pjesëmarrjen në këto protestat që janë kundër vendimit të fundit të Komisionit Rregullator për Energjetikë në Maqedoni për rritjen e çmimit të energjisë dhe heqjen e tarifës së lirë të energjisë. Protestat gjithashtu do të jenë edhe kundër ngritjes së çmimeve të derivateve të naftës, gazit dhe ngrohjes, transmeton INA.
Nga shtatori janë paralajmëruar edhe protesta të tjera masive kundër kompanisë EVN lidhur me tarifat e larta të energjisë elektrike dhe mungesën e kushteve për shlyerjen e tyre. /Telegrafi/
