Protesta kundër shtrenjtimeve
Në Shkup sot do të mbahet protesta kundër ngritjes së çmimit të energjisë elektrike dhe derivateve të naftës në Maqedoni.Protesta organizohet nga nisma qytetare “Aman” dhe do të fillojë në ora 18.00 para selisë së Komisionit Rregullator për Energjetikë (KRE).
Kjo lëvizje ka paralajmëruar se protesta do të mbahet çdo të martë në shenjë revolte të qytetarëve për shtrenjtimin e vazhdueshëm të energjisë elektrike, derivateve të naftës dhe ngrohjes.
“Aman” paralajmëroi se protesta do të mbahen edhe nëpër qytete të tjera dhe ato pritet të jenë masive dhe të kenë përkrahjen e qytetarëve.
Kjo lëvizje qytetare ka bërë të ditur disa kërkesa për uljen e çmimit të energjisë elektrike për 10 për qind, kthimin e tarifës së lirë ditore, heqjen e pagesës së rrymës industriale, ndërprerja e privatizimit të sektorit energjetik, investime qeveritare në burime tjera të energjisë – solare, me erë dhe gjeotermale, tërheqjen e rregullores së re të Ngrohtores, zvogëlimin e çmimit të ngrohjes për 4 për qind, zvogëlimin e vlerës së akcizës për derivatet e naftës, 6 denarë për benzinën dhe 5 denarë për dizelin si dhe përcaktimin e një kufiri që ndërpret rritjen e çmimeve të derivateve të naftës, transmeton INA. /Telegrafi/
