Protesta pro dhe anti-Putin në Moskë
Disa dhjetëra mijëra persona po marshojnë në rrugët e Moskës, në një protestë kundër rikthimit në pushtet të kryeministrit Vladimir Putin. Ky është tubimi i tretë që nga zgjedhjet parlamentare të dhjetorit, të cilat u shoqëruan me dyshime për manipulime të mëdha.
Por, mbështetësit e Putinit, që muajin e ardhshëm do kandidoj në zgjedhjet presidenciale, po zhvillojnë ndërkohë mitingun e tyre në një lokalitet tjetër.
Pjesëmarrësit në këto manifestime kanë sfiduar temperaturat që kanë arritur deri në -19 gradë Celsius.
Organizatorët e të dyja palëve, ata me moton “Për Zgjedhje të Ndershme” dhe mbështetësit e kryeministrit, shpresojnë se temperaturat e acarta nuk do t’i pengojnë marshimet.
“Kryesorja është që njerëzit të mos marrin pneumoni. Të rrish tre orë në të ftohtë është diçka serioze”, deklaroi politikani liberal Boris Nemtsov, organizator i protestës së opozitës, transmeton TCh.
Sheshi Kaluzhskaja në Moskë është mbushur me protestues që mbajnë në duar tullumbace të bardha, ngjyra e zgjedhur prej tyre për të shënuar fillimin e muajit mars.
Rreth 50 mijë persona u mblodhën në Moskë për protestën e parë pas zgjedhjeve të 4 dhjetorit, të cilat u fituan nga partia e Putinit, Rusia e Bashkuar. Por, pavarësisht deklaratave të qeverisë që mohonin manipulimin e zgjedhjeve, protestat u përhapën në të gjithë vendin.
Tre ditë më parë, opozita dhe grupe të të drejtave të njeriut sfiduan kryeministrin rus duke ngritur një banderolë me sloganin “Putin, ik”, e cila u hoq më vonë nga policia. Ndërsa, më herët gjatë muajit, policia ruse arrestoi në Sheshin e Kuq të Moskës një grup “punk” femëror që kishte kënduar një këngë proteste kundër tij. /Telegrafi/
