Punësimi me lidhje familjare, ryshfet dhe përkatësi partiake

12:09 / 12.05.2013

Lidhja Demokratike e Kosovës vlerësoi se mandati i Qeverisë Thaçi po identifikohet me tri çështje kryesore: papunësia, varfëria dhe korrupsioni. Sipas LDK-së, rreth 77% të qytetarëve vlerësojnë se këto tri probleme si më të rëndat në Kosovë në vitet e fundit.

LDK e vlerëson shqetësues faktin se punësimi në institucione qeveritare po bëhet mbi baza të lidhjeve familjare, ryshfetit dhe përkatësisë partiake.

“Gjatë vitit 2012, Qeveria Thaçi ka rritur punësimin në institucione qeveritare për mbi 900 persona. Anketat e fundit nga organizata ndërkombëtare, tregojnë se ky punësim është bërë në bazë të lidhjeve familjare dhe miqve në 38% të rasteve, ryshfetit në 24% të rasteve dhe përkatësisë partiake në 13% të rasteve. Niveli arsimor është shumë më pak i rëndësishëm për tu punësuar, vetëm 12%”, pohon LDK-ja.

Kjo parti thekson se si pasojë e kësaj, administrata publike është bërë jo profesionale dhe e mbushur me militantë partiakë.

“Qytetarët dhe bizneset në Kosovë duhet ta dinë se taksat e tyre, në vend që të përdoren për të nxitur punësimin, po përdoren për të paguar militantët partiakë të PDK-së dhe partive në koalicion me të. Lidhja Demokratike e Kosovës vlerëson se qytetarët kanë nevojë për projekte zhvillimore që nxisin punësimin në sektorin privat dhe bujqësinë në veçanti. Në vend që të investohet në projekte të tilla, gjysma e investimeve publike shkojnë në infrastrukturë rrugore në ndërkohë që vetëm 1% e qytetarëve mendojnë se infrastruktura rrugore është problem në Kosovë”, pohoi kjo parti. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.