Radhë të gjata në Morin-Vermicë
Radha e automjeteve që ishin nisur për në Shqipëri, të premten e të shtunën ka arritur deri në 5 kilometër, në pikën e kalimit në Morin-Vermicë. Ndërsa policia shqiptare është dorëzuar duke shprehur në pamundësinë e saj për të eliminuar radhët e gjata.”Nuk kemi se çfarë bëjmë me tepër. Kaq janë mundësitë dhe kapacitetet tona. Po punojmë me 6 sportele në dalje, por fluksi në dalje është i jashtëzakonshëm”, thotë kontrollori i pikë-kalimit kufitar të Morinit, Elez Doçi.
Nisur nga pritjet e gjata në radhë, drejtuesit e automjeteve kanë shprehur pakënaqësitë e tyre duke u rënë borive në shenjë proteste.
“Më janë dashur më shumë se dy orë për të hyrë në Kosovë nga Serbia dha tash po më duhen rreth dy orë për të dalë nga Kosova në Shqipëri. Nuk po di se çfarë po behet me ne shqiptarët. Në të gjithë Evropën kalojmë pa ndalesa, ndërsa në kufijtë e Kosovës si me Serbinë, po ashtu me Shqipërinë vazhdojmë të torturohemi”, shprehet i revoltuar Sabri Bajrami nga Gjilani, emigrant në Gjermani, i cili po kthehej bashkë me bashkëshorten për në vendbanimin e tij pasi kishte kaluar pushimet në Kosovë.
Përgjegjësi i turnit në pikën e kalimit kufitar të Morinit, Jahir Elezi, krijimin e radhëve të gjata e lidh me faktin e kthimit për në vendet e tyre të punës të emigrantëve që punojnë në Zvicër e Gjermani.
”Gjatë kësaj fundjave po kthehen të gjithë emigrantët e Zvicres, pasi të hënën në Zvicër fillojnë shkollat, kështu që emigrantët që kanë fëmijët në shkollë janë detyruar të kthehen. Kjo ka bërë që të krijohen rradhët e gjata”, thotë kryekontrollori Elezi, transmeton Koha.net
Ndërsa lidhur me procedurat lehtësuese në kuadër të sezonit turistik, përgjegjësi i turnit në doganën e Morinit, thotë se nga proceduarat lehtësuese përfitojnë vetëm automjetet me targa të Kosovës. /Telegrafi/
