Rama: Fitorja s’varet nga LSI, Topi të dalë nga qypi
Kreu i Partisë Socialiste, Edi Rama, i ftuar dje në emisionin “Tonight” të gazetares Ilva Tare në “Ora News”, deklaroi se fitorja e opozitës në zgjedhjet parlamentare të vitit të ardhshëm nuk varet nga Lëvizja Socialiste për Integrim.“Si mund të ketë marrëveshje, kur LSI është në qeveri. Sot LSI është në qeveri, bashkë me PD. Në vitin 2007 ne bashkë me LSI në Durrës, fituam me 700 e ca vota, ndërsa në 2011-ën fituam pa LSI-në me mbi tremijë vota. Ne jemi të gatshëm të bashkëpunojmë me çdo forcë që vendoset në kampin opozitar, por pa asnjë më të voglin dyshim fitorja e zgjedhjeve të ardhshme nuk varet asnjë fije nga çfarë do të bëjë LSI-ja”, ka thënë Rama.
Në pyetjen se si e vlerëson partinë e ish-presidentit Bamir Topi, Rama thotë se Topi duhet të “
të dalë nga qypi dhe të mos flasë si miza në qyp”.
“Sigurisht që është një parti e djathtë, por duhet ta ndajë nëse është pjesë e një loje të Saliut për të marrë votat e të pakënaqurve të Saliut për të shkuar pastaj me Saliun, apo është vërtet një alternativë kundër qeverisë. Të njëjtin qëndrim kam edhe për Aleancën Kuqezi”, theksoi Rama. /Telegrafi/
