Rikthim në pikën zero
Përfaqësimi i Kosovës nën ombrellën e Rezolutës 1244 do t’i shkaktojë vendit dëme të jashtëzakonshme, mendojnë ekspertët e marrëdhënieve ndërkombëtare, njohësit e Kushtetutës dhe analistët politikë. Sipas tyre, implementimi i fusnotës, përkatësisht Rezolutës 1244, do ta hedhë Kosovën në “fund të pusit”.Njohësi i të drejtës kushtetuese, Korab Sejdiu, thotë se fusnota nënkupton rikthim mbrapa, që, sipas tij, Kosovën e kthen në një status neutral (siç e ka njohur Rezoluta 1244) dhe jo me status të cilin e ka momentalisht, pra shtet i pavarur.
Politologu Labinot Greiçevci thotë se propozimi dhe pranimi i përfaqësimit të Kosovës nën Rezolutën 1244 do t’i japë mundësi të jashtëzakonshme politikës serbe që të propagandojë kundër pavarësisë së Kosovës.
Nga ana tjetër, eksperti për çështje juridike-kushtetuese, Riza Smaka, thotë se fusnota vjen në kundërshtim me nenin 1, paragrafin 1 të kushtetutës së Kosovës, i cili thotë: “Republika e Kosovës është shtet i pavarur, sovran, demokratik, unik dhe i pandashëm”.
Ndërsa, analisti Shkëlzen Gashi thekson se dëmet që po i bëhen Kosovës burojnë nga Deklarata e Pavarësisë, që me “virtytet e paqartësisë”, e bën të jetë “deklaratë e varësisë”. /Telegarafi/
