Rober Cooper tashmë është pensionuar
Nga tre protagonistët kryesorë të dialogut “teknik“ mes Kosovës dhe Serbisë (apo dialogut “Beograd - Prishtinë“ siç e quan BE-ja) dy tashmë nuk janë formalisht në postin që kanë pasur deri me tash.Ish-shefi i delegacionit të Serbisë Borko Stefanovic është deputet në Kuvendin e Serbisë, ndërsa, siç kemi mësuar nga burimet e BE-së, Robet Cooper, tashmë është në pension, shkruan të martën “Koha Ditore”.
Nuk dihet vetëm roli i Edita Tahirit dhe statusi i saj i deritashëm si shefe e delegacionit të Kosovës për dialog.
Diplomati britanik Rober Cooper, i njohur si “lehtësues” në dialogun e deritashëm mes Kosovës dhe Serbisë, ka dalë në pension dhe nuk punon më formalisht si zyrtar i BE-së. Është përfolur për ndonjë post të tij në Mianmar (Burma), megjithëse nga burimet e BE-së thuhet se ai është “në pension dhe është larguar nga Brukseli“.
Por diplomatët në BE nuk përjashtojnë mundësinë që baronesha Ashton të kërkojë “shërbimet e tij“ si këshilltar në ndonjë angazhim të saj në dialogun Kosovë - Serbi.
Përfaqësuesja e lartë e BE-së për Politikë të Jashtme dhe Siguri, Catherine Ashton, në atë kohë pa asnjë përvojë rreth Ballkanit e Kosovës, ia kishte besuar Robert Cooperit rolin që në emër të BE-së të ndërmjetësojë mes Kosovës dhe Serbisë në një dialog i cili thuhej se do të zgjidhte një varg problemesh praktike dhe teknike mes Prishtinës dhe Beogradi dhe në këtë mënyrë të kontribuonte në “përmirësimin e jetës së përditshme të qytetarëve”.
Aktualisht, në BE jo vetëm se mendojnë se ky dialog ka qenë i suksesshëm, por e përmendin atë si njërin ndër sukseset më të mëdha që ka pasur Bashkimi Evropian në fushën e politikës së jashtme dhe të sigurisë. /Telegrafi/
