Romët, ende pa strehë
Avokati i Popullit, Igli Totozani, në ditën e katërt të dyndjes së komunitetit rom në ambientet e institucionit, bën thirrje për gjetjen e një zgjidhjeje të përshtatshme për situatën në të cilën ndodhen familjarë të këtij komuniteti. “Ne po punojmë bashkërisht me Bashkinë, Ministrinë e Punës, për të gjetur një sistemim dhe një banesë të përhershme për këta qytetarë të Shqipërisë. Kemi një ndihmë të madhe nga organizata ndërkombëtare, qoftë për ushqime dhe ilaçe. Ministria e Shëndetësisë ka qëndruar në gatishmëri”, u shpreh Totozani, transmeton “BalkanWeb”.
Qeveria një ditë më parë tha se një repart ushtarak pranë Sharrës do të vihet ne dispozicion për strehimin e komunitetit rom. Ministria e Punës deklaroi se ambienti do ishte gati pas një muaji dhe në të mund te strehohen rreth 100 familje.
Totozani e cilësoi propozimin e qeverisë për strehimin e romëve si një zgjidhje jo të studiuar mirë. Pasi e ka vizituar vetë godinën ish ushtarake në Kombinat, Totozani u shpreh se objekti është totalisht i amortizuar dhe si i tillë nuk ofron as kushtet minimale për jetesë.
Më 1 shkurt, rreth 50 fëmijë, gra, të moshuar dhe burra nga komuniteti rom, kanë ngritur çadrat në ambientet e institucionit të Avokatit të Popullit. Qëllimi i tyre është gjetja e një mënyre për strehim. /Telegrafi/
