Rusia “kërcënon” NATO-n
Një zëdhënës i Ministrisë së Jashtme ruse tha të hënën se NATO nuk i ka mësuar leksionet nga ngjarjet e fundit në Kaukazin e Jugut.Zyrtari i Ministrisë së Jashtme, Aleksandër Lukasevic me këtë koment reagoi ndaj deklaratës së sekretarit të përgjithshëm të NATO-s Anders Fogh Rasmussen, gjatë një vizite më 6 shtator, në Tbilisi, në të cilën ai i tha Gjeorgjisë se “e ardhmja e Gjeorgjisë është në NATO”.
Lukasevic iu tha gazetarëve se “deklaratat e tilla tregojnë se NATO ende nuk i ka nxjerrë mësimet nga ngjarjet tragjike të vitit 2008 në Kaukazin Jugor" dhe vazhdon t’i dërgojë Tbilisit “sinjale inkurajuese”.
Lukasevic tha se Moska beson se deklaratat për anëtarësimin e mundshëm të Gjeorgjisë në NATO nuk do të forcojnë sigurinë rajonale dhe nxisin udhëheqësit e Gjeorgjisë, që të mos “e njohin realitetin politik të krijuar në rajon”, transmeton REL.
Pas luftës së shkurtër të vitit 2008 në mes të Rusisë dhe Gjeorgjisë, Moska njohu rajonet separatiste gjeorgjiane të Osetisë së Jugut dhe Abkhazisë. /Telegrafi/
