S'ka koalicion me PDK-në!
Ideja se Aleanca për Ardhmërinë e Kosovës (AAK) do të futet në koalicion qeveritar me Partinë Demokratike të Kosovës (PDK) është një spekulim dhe nuk ka fare të bëj me realitetin, ka deklaruar Daut Haradinaj, deputet i AAK-së në Kuvendin e Kosovës.Në rast të prishjes së koalicionit aktual qeverisës, Haradinaj ka thënë se në Kosovë duhet të mbahen zgjedhjet e jo të lidhen koalicione të tjera.
“Në rast se koalicioni ekzistues bie, përgjigje ndaj krizës eventuale institucionale nuk do të duhej të jenë koalicione të reja, por mbajtja e zgjedhjeve dhe vota e popullit, përkatësisht koalicione që dalin pas votimeve”, është shprehur Haradinaj për “InfoGlobin”.
Deklarata e Haradinjat vjen si përgjigje ndaj spekulimeve të ditëve të fundit në media, ku përflitet me të madhe mundësia e prishjes së koalicionit ekzistues, të dalë nga marrëveshja politike e lidhur pas zgjedhjeve të parakohshme të mbajtura në dhjetor të vitit 2010.
Partneri kryesor i partisë në pushtet, PDK-së, kryetari i Aleancës për Kosovën e Re (AKR), Behgjet Pacolli, i cili është njëkohësisht edhe zëvendësi i kryeministrit aktual të Kosovës, Hashim Thaçit, ka kohë që nuk ka shkuar në zyrën e tij në qeveri, duke zhvendosur aktivitetet e tij prej zëvendëskryeministri në hapësirat e hotelit në të cilin ai është pronar. /Telegrafi/
