Sejdiu, Mesic e Mojsiu “Qytetar Nderi” të Shëngjinit

Titulli “Qytetar Nderi”, ish presidentëve Sejdiu, Mesic e Mojsiu iu nda nga kryetari i komunës së Shëngjinit, Salvador Kaçaj, me motivacionin për kontributin e dhënë në forcimin e miqësisë të popullit shqiptar, pasqyrimin dhe promovimin e vlerave të qytetit në arenën ndërkombëtare.

Me këtë rast, ish presidenti i Kosovës, Fatmir Sejdiu tha se ndihet i nderuar për marrjen e çmimit “Mik i Qytetit”.

“Që në fillim dua të theksoj se nuk ishte aspak e rastësishme që Jul Cezari, në veprën "Lufta Civile" shquan Shëngjinin si porti Nymfeum. Ky port i bukurisë dhe nimfave mbijetoi duke sjellur që nga antikiteti të mira jo vetëm për banorët e këtushëm, por edhe për njerëzit e gjithë rajonit”, tha Sejdiu.

Ai theksoi se janë bërë hapa të rëndësishëm, sepse Shqipëria dhe Kosova, pavarësisht ndonjë pengese momentale, po ndërtojnë marrëdhënie vëllazërore, mbështetëse për njëra-tjetrën, aq të nevojshme për të arritur së bashku në cakun e përbashkët, në Bashkimin Evropian.

Para të pranishmëve, ish presidenti Sejdiu tha se edhe sot kur Kosova është shtet i pavarur dhe sovran, duhet të punojmë shumë, duhet të çmojmë atë që bënë brezat e kaluar, duhet të respektojmë lirinë e secilit për të pasur mundësinë t’ua përcjellim lirinë tonë edhe brezave që vijnë.

“Republika e Kosovës fitoi lirinë duke u bërë shtet i pavarur dhe sovran dhe ky çmim u dedikohet edhe të gjithë atyre që mundësuan që sot të jemi këtu bashkërisht. Ky çmim më bën nder të veçantë se më jepet në vitin kur shënojmë 100 vjetorin e Pavarësisë së Shqipërisë. Një Jubile kaq i rëndësishëm, duhet të na nxisë të gjithëve kudo që jemi, të punojmë më shumë, më ndershëm dhe më sinqerisht që portet tona dhe rrugët tona, në Shqipëri dhe në Kosovë, të mos mbyllen kurrë më, po të jenë të hapura dhe të lira përgjithmonë”, u shpreh Sejdiu. /Telegrafi/