Serbët kthejnë mbrapsht EULEX-in në Zubin Potok
Një grup serbësh kanë kthyer mbrapsht të martën në mëngjes një kolonë të automjeteve të EULEX-it, e cila po qarkullonte drejt Bërnjakut, bëjnë të ditur burime të Kosovapress-it.Sipas këtyre burimeve, ngjarja ka ndodhur para orës 8:00 të mëngjesit në hyrje të Zubin Potokut.
“Edhe pas bisedimeve që kanë zgjatur rreth një orë mes përfaqësuesve të EULEX-it dhe serbëve të tubuar, nuk është arritur marrëveshje, dhe pjesëtarët e Misionit Ndërkombëtar janë kthyer mbrapsht, duke përdorur pastaj rrugë alternative për të arritur në Bërnjak”, kanë thënë burimet.
Burimet më tej kanë shtuar se e tërë kjo ngjarje ka ndodhur me pretekst për të penguar doganierët dhe policët kufitarë të Kosovës të shkojnë në kufirin e Bërnjakut.Ngjarjen e ka konfirmuar edhe policia e Kosovës në Mitrovicë, pa dhënë shumë detaje. /Telegrafi/
