Serwer: Dëmtuesit e varrezave nuk janë patriotë
Analisti politik nga Washingtoni, Daniel Serwer u shpreh se shqiptarët e Kosovës duhet të respektojnë varret e serbëve dhe të mos i prekin, duke thirrur njëkohësisht autoritetet në Prishtinë që të arrestojnë dhe gjykojnë ata që sulmojnë serbët në Kosovë dhe iu shkatërrojnë pasurinë.Në blogun e tij Peacefare.net, në tekstin me titull “Si do të vepronte patrioti”, ai vlerësoi se prapa sulmeve ndaj serbëve të Kosovës qëndrojnë ata të cilët nuk janë patriotë.
“Dikush në Kosovë mendon që përgjigja e vërtetë është dhuna kundër serbëve dhe pasurisë së tyre. Kjo nuk është vetëm budallallëk, por edhe kundër produktive, sepse dikush këtë do ta shfrytëzojë si dëshmi se shqiptarët nuk janë të civilizuar dhe nuk i përkasin Evropës”, shkruan Serwer, i njohur si mbështetës i pavarësisë së Kosovës dhe shpesh për qëndrime të ashpra kundër politikës serbe, transmeton Koha.net.
Ai fton shqiptarët që të protestojnë qetë, për të shtuar se mos nxjerrja para drejtësisë e dhunuesve të varreve të serbëve do ta nxinte shtetin e Kosovës.
Serwer thekson që të gjithë kanë të drejtë në heronjtë e vet, por se shqiptarët e Kosovës do të duhej të tregojnë një dozë ndjesie për palën tjetër, 15 vjet pas luftës.
“Ku në Kosovë mund të gjeni përmendore kushtuar serbëve?”, pyetet analisti amerikan.
Sipas Serwerit, heqja e lapidarit kushtuar UÇPMB-së në Preshevë ishte një budallallëk, por shton se qeveria serbe ishte mjaft e mençur për të mos e shkatërruar atë, por e ka transferuar në Beograd, ku mëtohet të shërbejë si dëshmi në procesin gjyqësor.
Serwer ka shkruar se heqja e lapidarit kushtuar luftëtarëve kundër regjimit të Milosheviqit ka hidhëruar shqiptarët në Kosovë, disa nga të cilët kanë ikur nga Lugina shkaku i maltretimit policor në Preshevë, Bujanoc e Medvegjë. /Telegrafi/
