Shamia nuk është uniformë fetare?!

17:09 / 15.02.2013

Bashkësia Islame e Kosovës (BIK) ka konfirmuar se shamia nuk është uniformë fetare, por është një veshje e zakonshme sipas rregullave islame. Reagimi i BIK-ut pason një deklaratë të ministrit të Arsimit, Ramë Buja, i cili ka theksuar se do të kërkojë nga BIK-u që të sqarojë çështjen e shamisë, ndërsa ka shpjeguar se në bazë të këtij interpretimi, më pas do të ndryshohet edhe një Udhëzim Administrativ për çështjen e propagandës fetare në shkollat publike, i cili është marrë si bazë ligjore për përjashtimin nga procesi mësimor të vajzave që kanë bartur shami.

Kryeimami i Kosovës, Sabri Bajgora, ka deklaruar për Telegrafin se është e qartë se shamia nuk është uniformë fetare, siç identifikohet në raste të caktuara.

“Uniformë fetare llogaritet çallma në kokën e imamëve edhe veshja e tyre. Ndërsa, shamia është veshjeve personale e femrave që duan të respektojnë rregulluat islame për këtë çështje”, ka thënë Bajgora.

Bashkësia Islame e Kosovës është duke përgatitur një përgjigje zyrtare, e cila do t’i dërgohet Ministrisë së Arsimit dhe institucioneve të tjera. Bajgora ka shpjeguar se përgjigje të ngjashme janë adresuar shumë herë në të gjitha institucionet e vendit.

Gjatë një interviste në emisionin “Interaktiv” të KTV-së, ministri Ramë Buja ka deklaruar se në rast se BIK-u do të vlerësonte zyrtarisht se shamia nuk është uniformë fetare, atëherë Ministria e Arsimit do të ndryshonte një Udhëzim Administrativ, duke lënë të nënkuptohet se ndryshimi do të hiqte pengesat për vajzat me shami që ndjekin mësimet në ciklin e ulët dhe të mesëm të arsimit.

Deri tash ka pasur disa raste kur vajza që bartin shami janë përjashtuar nga procesi mësimor, duke u mbështetur në Udhëzimin Administrativ të Ministrisë së Arsimit, sipas të cilit ndalohet propagandimi fetar dhe bartja e simboleve fetare në shkollat publike. /Telegrafi/
 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.