SHBA demanton vrasjen e shtetasve në Pakistan
E plotësuar: Ambasada e Shteteve të Bashkuara në Pakistan ka hedhur poshtë raportet për vrasjen e dy shtetasve të saj në Peshawar.Ambasada ka bërë të ditur se dy shtetas amerikanë, të cilët punonin për Konsullatën e SHBA-së në këtë qytet, janë plagosur nga sulmi me bombë kundër makinës së tyre.
Në deklaratën e ambasadës thuhet se sulmi pranë kufirit afgan, ka plagosur edhe dy punonjës pakistanezë të konsullatës.
“Një sulm, siç duket terrorist, ka pasur në shënjestër automjetin e Shteteve të Bashkuara dhe dy amerikanë, ashtu si edhe dy pakistanezë, janë plagosur dhe kanë marrë trajtimin mjekësor”, thuhet në deklaratën e Ambasadës amerikane në Islamabad.
Ndryshe, më herët autoritetet pakistaneze thonë se dy shtetas amerikanë kanë humbur jetën nga shpërthimi i makinës bombë në Peshawar të Pakistanit.
Lajmin e ka konfirmuar ministri për informim i provincës Khiber, Mian Iftikar.
Siç njofton Evropa e Lirë, burimet zyrtare kanë njoftuar se sulmuesi vetëvrasës ka përplasur makinën e mbushur me eksplozivë në automjetin që përdorej nga Konsullata e Shteteve të Bashkuara në Peshawar.
Shpërthimi ka ndodhur në një zonë ku është e pozicionuar Konsullata amerikane, ashtu si edhe organizata të tjera të huaja, përfshirë Kombet e Bashkuara.
Të paktën 18 persona janë plagosur në sulm. Ambasada e SHBA-së në Pakistan tha se është duke hetuar ngjarjen.
Përgjegjësinë për sulmin nuk e ka marrë ende asnjë grup, ndonëse, në të kaluarën, talibanët pakistanezë janë fajësuar për sulme të ngjashme. /Telegrafi/
