SHBA-të, miliona dollarë për kundërshtarët e Assad
Administrata e presidentit Barack Obama po shton mbështetjen financiare për kundërshtarët e presidentit Bashar al-Assad. Sekretarja e Shtetit, Hillary Clinton, ka bërë të ditur se Washingtoni do të japë edhe 15 milionë dollarë për kundërshtarët politikë të Assad dhe 30 milionë dollarë të tjera si ndihmë humanitare për ata që janë zhvendosur për shkak të luftimeve."Kushtet në Siri vazhdojnë të përkeqësohen, ndërkohë që regjimi i Assadit lufton pa pushim me popullin e vet. Për më tepër, ne po shikojmë më shumë njerëz të shtruar në spitale, më shumë trupa në morge dhe më shumë refugjatë që lartohen nga vendi i tyre për në vendet fqinje”, citon Kosovapress fjalët e Clinton.
Këto komente ajo i ka bërë në një takim të ministrave të jashtëm të vendeve të grupit të quajtur “Miqtë e Sirisë”. Disa nga vendet e këtij grupi ndihmojnë në armatosjen e kryengritësve sirianë. Të tjerë, si Shtetet e Bashkuara, i kanë kufizuar ndihmën e tyre në nevojat humanitare.
Rusia dhe Kina vazhdojnë të bllokojnë masa më të rrepta kundër Damaskut në Këshillin e Sigurimit të Kombeve të Bashkuara, duke argumentuar se sanksionet janë me pasoja në punët e brendshme të Sirisë dhe se zgjidhja e konfliktit nuk mund të detyrohet nga jashtë.
Sekretari i përgjithshëm i Lidhjes Arabe, Nabil ElArabi, tha në takim se ka ardhur koha për një tranzicion politik në Siri, sepse gjendja po acarohet gjithnjë e më shumë. /Telegrafi/
