SHBA, vritet snajperi “i pagabueshëm” (Video)

19:57 / 4.02.2013

Chris Kyle, “snajperi i pagabueshëm” i forcave speciale të ushtrisë amerikane dhe autor i bestsellerit “American Sniper”, është vrarë në Teksas bashkë me një person tjetër në një poligon qitjeje.

Ish-qitësi i dalluar i ushtrisë amerikane, 38 vjeç, i njohur si “legjenda” për shokët e luftës dhe “Djalli i Ramadit” për armiqtë e tij, kishte deklaruar në autobiografinë e tij se kishte vrarë mbi 250 guerilë në Irak.

Për momentin nuk dihen motivet e vrasjes, ndërsa sipas mediave amerikane autori i saj është një ish-marins, që është arrestuar tashmë nga policia.

Skena e krimit, sipas “Dallas Morning News”, është poligoni i qitjes në Raf Krik Loxh, në shtetin e Teksasit. Sherifi i kontesë së Erathit ka konfirmuar se për vrasjen e dyfishtë është arrestuar 25-vjeçari Eddie Routh, në një distancë prej 110 kilometrash nga skena e krimit.

 

Mesa duket, ushtari i ri vuan nga stresi post-traumatik. Viktima e dytë është identifikuar si Chad Littlefield, 35 vjeç. Agjentët po vazhdojnë hetimet për të zbardhur skenarin e vrasjes, transmeton TCH.

Chris Kyle kishte hyrë në marinën amerikane në vitin 1999 dhe shumë shpejt ishte bërë pjesë e njësisë elitare Navy Seal, duke fituar famën e një snajperi të pagabueshëm.

Në librin e tij, Kyle tregon për luftën në Irak, për viktimën e tij të parë që kishte qenë një grua dhe një tjetër që kishte qenë një iraken i pajisur me raketahedhëse.

Ai thotë se periudha e luftës kishte qenë pjesa më e bukur e jetës së tij, duke shkaktuar shumë polemika dhe duke bërë që disa ta konsideronin një kriminel dhe të tjerë një hero. /Telegrafi/


 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.