Zgjerohen sanksionet ndaj Iranit
SHBA ka ashpërsuar sanksionet ekzistuese ndaj Iranit, në përpjekje për të nxitur Teheranin të braktisë programin e saj të armëve bërthamore. Masat e reja kufizojnë qasjen e Iranit në të ardhurat vetjake nga nafta, por përfshijnë gjithashtu edhe kufizime financiare ndaj medias shtetërore të Iranit.
Sanksionet marrin efekt pas kalimit të një ligji në Kongres, rreth 6 muaj më parë. Bisedime ndërkombëtare mbi programin bërthamor të Iranit do të mbahen më vonë gjatë këtij muaji.
Të ardhurat, që do të sigurojë tashmë Irani nga shitja e naftës drejt 9 blerësve potencialë, përfshi këtu Kinën, Indinë dhe Turqinë, do të kreditohen në një llogari bankare në këto vende, duke mos u riatdhesuar në Iran, raporton TCH.
Nën këto sanksione, paratë mund të përdoren nga Irani vetëm për blerjen e të mirave nga këto vende.
Institucionet financiare, që kryejnë marrëdhënie biznesi me Iranin, e dinë se rrezikojnë të ndëshkohen nga sistemi financiar amerikan, nëse thyejnë ndonjë nga këto rregulla strikte të reja.
Thesari i shtetit amerikan bëri të ditur se sanksionet e reja kanë bllokuar efektivisht të ardhurat iraniane nga nafta përtej detit.
Thesari, i cili drejtohet nga sekretari David Cohen, bëri të ditur se SHBA do të vazhdojë të forcojë kufizimet “për sa kohë që Irani do të vazhdojë të mos zgjidhë shqetësimet e komunitetit ndërkombëtar, në lidhje me programin e tij nuklear”. /Telegrafi/
