Shënohet 20 vjetori i ARM-së
Me rastin e shënimit të 18 Gushtit, Ditës së Armatës së Republikës së Maqedonisë, presidenti i shtetit dhe komandant suprem, Gjorge Ivanov të premten do ta presë personelin kyç dhe pjesëtaret e ARM-së, të cilët e kryejnë obligimin në misionin ISAF në Afganistan dhe në misionin ALTEA në BeH. Siç paralajmëroi kabineti i tij, Ivanov do të realizojë edhe lidhje video-konferenciale me kontingjentet e ARM-së të cilëve personalisht do t'ua urojë 20-vjetorin jubilar të ARM-së.
Në kuadër të festimit të jubileut, është paraparë rreshtim solemn i të punësuarve në Ministrinë e Mbrojtjes dhe Shtatmadhorinë e ARM-së para ndërtesës së Ministrisë me ç'rast do të mbajnë fjalim ministri i Mbrojtjes, Fatmir Besimi dhe shefi i SHM-së së ARM-së gjeneral major Goranco Koteski, njofton Zhurnal.
Në rreshtim do të marrin pjesë udhëheqësit e MM-së, shefat e njësiteve organizative në SHM-në e ARM-së, të punësuarit në MM dhe SHM-në e AMR-së, si dhe gjeneralët e pensionuar dhe ish pjesëtarët e tyre.
Në solemnitet do të lexohen urdhra për avancim, dorëzimin e plaketave, distinktivëve dhe falënderimeve me rastin e jubileut "20 vjet ARM" për pjesëtarët e MM dhe SHM-së së ARM-së, familjeve të pjesëtarëve të ARM-së të cilët kanë humbur jetën dhe bashkëpunëtorëve të jashtëm, si dhe masa stimuluese me rastin e Ditës së ARM-së.
Në kazermën "Ilinden", në Shkup, sonte do të bëhet qitje artilerike nderi me qitjen e 10 plutonëve nga armët artilerike, nga ana e Njësitit të batalionit artilerik të ARM-së. Në qitjen e nderit, do të gjuhen edhe fishekzjarrë. /Telegrafi/
