Shkelëse presidentja, shkelës kryeministri...!
Askush nuk e ndalë presidenten Atifete Jahjaga të jap dorëheqje, ajo e din që është pjesë e marrëveshjes. Ajo e din që në Kuvend ka thënë se do ta respektoj marrëveshjen e liderëve. Kështu ka thënë në një intervistë për “Tribuna Shqiptare”, shefi i Grupit Parlamentar të LDK-së, Ismet Beqiri.“Duhet të ketë një minimum të korrektësisë edhe nga ana e saj në këtë rast, por problemi nuk është vetëm të presidentja, sa është problemi te Hashim Thaçi. Ky është problemi, dhe ai është shkelësi i kësaj marrëveshje”, ka thënë Beqiri.
Sipas tij, LDK-ja është e zhgënjyer edhe nga ambasadori Christopher Dell. “Sigurisht se nuk mund ta mirëpresim qëndrimin e tij, sepse është garantuesi kryesor dhe kur është bërë marrëveshja është bërë nga ekspertët dhe me Kushtetutën në dorë të Republikës së Kosovës. Ajo që ka bërë z. Dell nuk dëshiroj ta komentoj, por sigurisht për neve është zhgënjyese”, thotë ai.
Kurse sa i përket kërkesës se kryeministrit Thaçi për krijimin e Grupit të Unitetit për bisedime me Serbinë, ai thotë se qëndrimi i LDK-së është shumë i qartë. “Ne vazhdojmë të qëndrojmë pranë asaj se Kosovës nuk i duhet kurrfarë Grupi i Unitetit”. /Telegrafi/
