Shkup, vazhdon rrahja brutale e shqiptarëve, njëri në shok-dhomë

21:39 / 4.01.2013

Fëmijët shqiptarë rrihen sërish nga grupet huligane maqedonase. Viktimat e fundit janë katër 16 vjeçarë shqiptarë, të rrahur në lagjen Aerodrom të Shkupit, pa ndonjë shkas apo pretekst.

Ngjarja ka ndodhur rreth orës 17:00, në lagjen Aerodrom, kur katër të rinjtë kanë shkuar të japin testin e ndihmës së shpejtë, të nevojshme për patent-shoferin. Papritmas janë sulmuar nga mbi 20 të rinj maqedonas, ndërsa bilanci është: një në shok-dhomë dhe tre me plagë të rënda trupore, raporton “Alsat-M”.

"Sa dolëm te udha, kur i pamë 20 veta, vrapuan, na zunë dhe na rrahën. Veç bërtitën. Maqedonas ishin. Si na zunë me na rrahën me shkop bejsbolli. Ata ishin 20-30 vetë, ne ishim pesë vetë", deklaroi Riad Iljazi, njëri prej të rrahurve.

Prindi i Riadit tregon se nga frika që të mos ndodhë kjo që ka ndodhur sot, e ka tërhequr djalin nga shkolla e mesme ndërtimore “Zdravko Cvetkovski - GUC” e cila ndodhet në Karposh IV, por as që ka menduar se i biri do ti kthehet i rrahur brutalisht në momentin që ka shkuar të jep testin për patent-shofer.

"Unë jam prindi i Riadit. Vitin e parë e ka të kryer në GUC. Për këtë arsye e nxora. E dija se do të ndodhë kjo, dhe ja që ndodhi. Te shqiptarët nuk ka përgjegjësi, nuk ka kush i mbron askush. Ky shtet për mua është katastrofë. Me ndodhë shqiptarët me i rrahi maqedonasit, kapen menjëherë. Shqiptarët kur rrihen, kryerësit nuk kapen asnjëherë. Nuk ka ndodhur rastësisht kjo", u shpreh Naser Iljazi, prindi i Riadit.

Të rrahurit janë nga fshatrat Lubin, Kopanicë dhe Bojanë. Menjëherë pas rrahjes, ato janë shtrirë në Spitalin e Qytetit në Shkup. Familjarët e tyre kërkojnë nga policia që rasti të zbardhet urgjentisht dhe huliganët të marrin dënimin e merituar. Nga MPB sonte nuk arritëm të marrim informata për këtë rast. /Telegrafi/

 


 

Komente

Vërejtje:
Telegrafi ka ofruar gjithmonë hapësirë të lire për komentime dhe për diskutim, me qëllimin e mirë të nxitjes së debateve. Por, për shkak të disa komentuesve të papërgjegjshëm, që keqpërdorin këtë mundësi, kemi vendosur ta ndryshojmë qasjen drejt komentimit të lajmeve. Tash e tutje, komentuesit në rubrikat "Lajme" dhe "Ekonomi", profilin e tyre duhet ta autorizojnë me email valid.

Çdo përdorues, në panelin "Settings" duhet të vendos emailin valid, e pastaj të kërkojë që në atë adresë elektronike t'i dërgohet linku për aprovim. Ky link duhet të klikohet, që të autorizohet profili përmes të cilit mund të komentoni.